Tóbakstugga

Sorority Boys

Vond mynd, vond þýðing. Vonandi er þetta ekki metnaður þýðenda í hnotskurn. Þessi mynd er uppfull af þýðingarvillum enda kemur nafnið á þýðandanum ekki fyrir á endanum. Hann veit þá líklega upp á sig skömmina. Þrjú dæmi sem ættu að sýna fram á ófrumlegheitin og gefa kannski góða mynd af hvernig metnaðarleysið var algjört. Í myndinni voru þrjú systra og bræðrafélög. K.O.K.(Kappa Omega Kappa), Tri Pi (Pí Pí Pí) og D.O.G. (Delta Omega Gamma). K.O.K. var Þýtt K.O.K. Tri Pi var þýtt Tri Píurnar og D.O.G. var þýtt H.U.N.D.A.R.N.I.R. Þarna er þýðandinn fyrst og fremst að reyna að þýða brandara með frekar misheppnuðum hætti Dog = hundur og einnig er hann að reyna að búa til brandara sem ekki var fyrir í myndinni með því að kalla Tri Pi, Tri píurnar. Þarna er mikið ósamræmi á ferðinni og einnig tilraun sem mistekst. Þarna hefði hann átt að halda sér við skammstafanirnar og bæta kannski við útskýringu fyrir aftan D.O.G. Á einum stað í myndinni minnist strákur einn á að hann líti út eins og "Wookie". Þarna virðist einnig vera á ferðinni ákveðin vanþekking á kvikmyndasögunni hjá þýðanda að vita í fyrsta lagi ekki að "Wookie" er tegund loðinna tvífætla í Stjörnustríðssexlogíunni.
Í öðru lagi að reyna að skrifa niður orðið eftir hljóði. En nú vitum við það greinilega að Loðinn er af tegund Vúkí. Hann hlýtur að vera glaður með það.
Þýðingar á samræðum voru líka álíka vel þýddar og látum við eina flakka. "He told me you´d say that too" Var þýdd sem: "Hann myndi líka segja það við þig". Þarf að segja meir?

The Lost Boys (1987)

Í þessari ágætu vampírumynd er borgin Santa Carla nokkrum sinnum kölluð "the murder capital of the world". Hinn óþekkti (eða óþekki) þýðandi þýðir þennan frasa sem "mesta glæpaborg í heimi". Vissulega er morð glæpur en þarna ætlar hann litla sjávarplássinu Santa Carla meira en af því er hægt að ætlast.

JFK (1991)

Í formála kvikmyndarinnar JFK er Fidel Castro lýst á eftirfarandi máta: "Castro is a successful revolutionary, frightening to American business interests in Latin America." Þetta er þýtt á þessa vegu "Castro er byltingarmaður og honum gengur vel að gera bandaríska hagsmuni tortryggilega í Rómönsku Ameríku."
Þarna hefði frekar mátt segja að stjórn Castros ógnaði viðskiptahagsmunum Bandaríkjanna.

The Big Chill (1983)

Í kvikmyndinni The Big Chill spyr Michael (Jeff Goldblum) vin sinn Nick (William Hurt) "Is that a 'lude?" Þýðandinn er greinilega ekki harðnaður dópisti þar sem hann þýðir lude sem LSD. Lude er hins vegar stytting á Quaalude sem er róandi lyf.

Einnig kemur fram í sömu mynd áhugaverð þýðing (veit ekki hvort sé hægt að kalla hana villu) á sjálfsfróun. Sam (Tom Berenger) spyr Harold (Kevin Kline) "Do you jerk off?" í framhaldi að samtali þeirra um sjálfsfróun. Þetta er þýtt sem "Ertu að fíflast?" Vissulega eru til mörg heiti yfir sjálfsfróun og kannski hefur þýðandinn bara verið að fíflast.

Matrix - Kvikmynd frá 1999

Kvikmyndin Matrix er frábær skemmtun og er með henni mælt af velflestum unnendum góðrar hasarheimspeki. Einnig getur mikil skemmtun falist í pínlegum þýðingarvillum eins og eftirfarandi dæmi sýna:
Í hinu margfræga Kung-Fu atriði myndarinnar brýst út mikil múgsefjun þegar hinn glaðværi Mouse kunngjörir öðrum áhafnarmeðlimum: "Morpheus is fighting Neo." Þetta útleggur þýðandi sem svo: "Morpheus hræðir Neo." Vitaskuld á þarna að standa "Morpheus slæst/berst við Neo." Þetta er greinilega misheyrn, þar sem Mouse mælir þessi orð í miklu þjósti.
Seinni mistökin sem gripu augu mín og eyru komu fram þegar Morpheus kennir Neo þá mikilvægu lexíu að treysta engum innan "fylkisins". Þar umbreytist rauðklædd kona í það sem Morpheus kallar "sentient programs." Þetta útleggst hjá þýðanda "tilfinninganæm forrit", sem er þó ekki fjarri lagi. En seint myndi Agent Smith kallast tilfinninganæmur. Rétt merking
orðsins sentient er mun nær Skyni gæddur. Þannig gæti sentient programs útlagst: "Skyni gædd forrit.". Orðabókarskilgreiningu á orðinu sentient er að finna hér. Til frekari skýringa má skoða orðið sentience.

Desperate Hours

Fyrir réttum 13 árum kom kvikmyndin Desperate Hours í leikstjórn Michael Cimino út á myndbandi. Þessi spennumynd skartaði Anthony Hopkins í aðalhlutverki og átti persóna hans að vera fyrrverandi hermaður úr Víetnamstríðinu. Aftan á myndbandshulstrinu var hann hins vegar kallaður "dýralæknir". Það er töluverður munur á veterinarian (dýralæknir) og veteran (uppgjafarhermaður).